بداية المواعيد

السلام عليكم ورحمة الله وبركاته 

اولاً  حالتي اللي هي"كلاس 3"

تقدم في الفك السفلي وتراجع في الفك العلوي وميلان في عظمة الأنف 

بديت مراجعاتي في عملية الخشم عند جمال الذيب في مستشفى العسكري بالرياض 

قال لي ضروري عملية الفك بالنسبة لك و و و وكتب لي تحويل لمبنى جراحة الوجهه والفكين 

في نفس الوقت قال بكتب لك موعد بعد شهووور طويلة نسيت بالضبط قال تكونين سويتي عملية الفك واسوي عملية الخشم 

طبعاً رحت لموعد الفك وكان الرفض من الوالد العزيز كان يقول ههههههه (ب يكسرون جمجمتك ويقدمونها ) 

طبعاً بحكم الجهل المهم رحت وقالوا موعد وتعرفون عاد مستشفى حكومي 

وطبعا سحبت على موعد الفك قلت راضيه بالفك نسوي الخشم بس ولمى جاء موعد الخشم مره ثانية قال لي اسمعي البناء اذا بتسوينه ضروري يكون الاساس مبني صح وعشان كذا ضروري تسوين عملية الفك اول شي وتحويل مره ثانية لجراحة الفوجهه والفكين 

المهم ناسية بالضبط متى مراجعاتي بدت لكن الترم الثاني لعام 1436هـ 

كنت كل يوم اثنين اسافر من بريدة للرياض من الجامعة لرياض عشان الموعد يكون الصبح اليوم الثااني ومن المستشفى للبريدة مره ثانيه :( كانت فعلاً شققاء والله 

المهم ماسحبت ولا على اي موعد وتحددت عمليتي في شهر 8 اول شي ثم تكنسلت لأسباب مدري ايش 

مره ثانية تحدد الموعد في 10/11/1436هـ  وتكنسل بسبب كورونا بالمستشفى ومسوين عزل طبي 

وتحدد مره ثانية في 28/11/1436 هـ وتتكنسل بسبب حالات الحرب الطارئه بالجنوب

وفيه موعد انكتب لي تنويم ب 14/1/1437هـ 

كانت مواعيدي مع الأستشارية الدكتورة امتنان الماجد 
ومعاها نهى الشريدة وعلي العنزي " وبكل مصداقية والله اني ادعي لهم في صلاتي من شدة انهم جججداً كويسين بالتعامل وكل شي"

وطبعاً خلاص هنا اختصرت تقريباً رحلتي في المستشفى